დღეს, უეფამ გამოაქვეყნა იმ 12 ფეხბურთელის სია, რომლებიც ორგანიზაციის ვერსიით, გასული სეზონის საუკეთესო ფეხბურთელის წოდებისთვის იბრძოლებენ. ფეხბურთელები წარდგენილნი არიან პოზიციების მიხედვით – თითო პოზიციაზე 3 მოთამაშე. 26 აგვისტოს, ჩემპიონთა ლიგის ჯგუფური ეტაპის კენჭისყრის დროს, ცნობილი გახდება როგორც გასული სეზონის საუკეთესო ფეხბურთელის, ასევე პოზიციების მიხედვით საუკეთესოების სახელები. ნომინანტები შერჩეულნი არიან 2009-2010 წლების სეზონის ჩემპიონთა ლიგის 1/8-ფინალში გასული გუნდების მწვრთნელების მიერ.
როგორც მოსალოდნელი იყო, ნომინანტთა შორის ყველაზე მეტი წარმომადგენელი ჩემპიონთა ლიგის მფლობელ “ინტერს” ჰყავს. გასული საკლუბო სეზონის ტრიუმფატორმა გუნდმა საუკეთესო თორმეტეულში 5 ფეხბურთელი მიავლინა. მეორე ადგილზეა “ბარსელონა”, რომელიც 4 მოთამაშითაა წარმოდგენილი. ყველა პოზიციაზე მინიმუმ ერთი ნომინანტი მაინც მხოლოდ “ინტერსა” და “ბარსელონას” ჰყავთ.
გთავაზობთ ყველა ნომინანტს პოზიციების მიხედვით:
მეკარეები: ჟულიო სეზარი (“ინტერი”), უგო ლორისი (“ლიონი”), ვიქტორ ვალდესი (“ბარსელონა”);
მცველები: ლუსი, მაიკონი (ორივე “ინტერი”), ხერარდ პიკე (“ბარსელონა”);
ნახევარმცველები: ხავი ერნანდესი (“ბარსელონა”), არიენ რობენი (“ბაიერნი”), ვესლი სნეიდერი (“ინტერი”);
თავდამსხმელები: ლიონელ მესი (“ბარსელონა”), დიეგო მილიტო (“ინტერი”), უეინ რუნი (“მანჩესტერი”)
აქვე შეგახსენებთ 2009 წლის გამარჯვებულების ვინაობებსაც: საუკეთესო მეკარე –ედვინ ვან დერ სარი (“მანჩსტერი”), საუკეთესო მცველი – ჯონ ტერი (“ჩელსი”), საუკეთესო ნახევარმცველი – ხავი ერნანდესი (“ბარსელონა”), საუკეთესო თავდამსხმელი და საუკეთესო ფეხბურთEლი – ლიონელ მესი (“ბარსელონა”)