ჩარლტონი ნაკრებში ბრიტანეთის ჩემპიონატში შოტლანდიელებთან სათამაშოდ გამოიძახეს, ბობიმ დებიუტი ჩინებული გოლით აღნიშნა. მისი თამაშით გულშემატკივარი მოიხიბლა. ასე დაიწყო ჩარლტონის ხანგრძლივი სანაკრებო გზა.

თავის მეორე მატჩში პორტუგალიის ნაკრებთან (2:1) ჩარლტონმა დუბლი შეასრულა და 1958 წლის მსოფლიოს ჩემპიონატზეც წაიყვანეს შვედეთში, თუმცა იქ წუთიც კი არ უთამაშია, რამაც ჟურნალისტების კრიტიკა გამოიწვია. 1962 წელს კი ჩილეში გამართულ მსოფლიოს ჩემპიონატზე ინგლისის ნაკრები მეოთხედფინალში მომავალ ჩემპიონ ბრაზილიასთან დამარცხდება.

მიუნხენის ტრაგედიის შემდეგ მეტ ბასბიმ გუნდის გარდაქმნა დაიწყო, 1966 წელს კი ჩარლტონი ევროპის საუკეთესო ფეხბურთელად დაასახელეს.

ამ დროს ინგლისის ნაკრების მწვრთნელი ალფ რამსეი იყო, რომელმაც გუნდის შენება ჩარლტონის ირგვლივ დაიწყო. ინგლისი მსოფლიოს ჩემპიონატს მასპინძლობდა. ჩემპიონატის დაწყების წინ ჩარლტონისგან ყველა სტაბილურ და მაღალი დონის თამაშს ელოდა.

ბობიმ და ინგლისის ნაკრებმა მშვენივრად ითამაშეს და მსოფლიოს ჩემპიონები გახდნენ.

1968 წელს, მიუნხენის ტრაგედიიდან 10 წლის შემდეგ, "მანჩესტერი" პირველი ინგლისური კლუბი გახდა, რომელიც ჩემპიონთა თასის ფინალში გავიდა. ფინალში მანჩესტერელებმა 4:1 მოუგეს "ბენფიკას", 2 ბურთი ჩარლტონმა გაიტანა და პირველი ინგლისელი კაპიტანი გახდა, რომელმაც ეს თასი აღმართა. რამდენიმე დღეში კი ბობიმ ინგლისის ნაკრებში თავისი 45–ე ბურთი გაიტანა და ჯიმი გრივზის რეკორდი დაამხო.

1969 წელს ფეხბურთში შეტანილი დამსახურებისთვის ბობი ბრიტანეთის იმპერიის ორდენით დააჯილდოვეს. მომდევნო წელს კი რამსეიმ ისევ შეიყვანა სამუნდიალო განაცხადში. ჩარლტონი ერთადერთი ინგლისელი ფეხბურთელია, რომელიც 4 მსოფლიოს ჩემპიონატზე წაიყვანეს (ერთში არ უთამაშია). მეოთხედფინალში ინგლისი 2:0–ს უგებდა გერმანიას, მაგრამ 2:3 დამარცხდა და 32 წლის ჩარლტონმაც სანაკრებო კარიერისთვის თავის დანებება გადაწყვიტა.

ნაკრებში გატანილი გოლების რაოდენობით – 49 – ჩარლტონს საუკეთესო მაჩვენებელი აქვს ინგლისელ ფეხბურთელთა შორის, ხოლო თამაშების რაოდენობით – 106 – მხოლოდ ბობი მური და პიტერ შილტონი უსწრებენ. ჩარლტონს ეკუთვნის "მანჩესტერის" მაისურით ყველაზე მეტი გატანილი გოლი – 249, ხოლო მასზე მეტი თამაში (758) მხოლოდ რაიან გიგზს აქვს ჩატარებული.